Tre persona janë gjetur të vdekur në fshatin Rufc të Lipjanit.
Ndërkohë sipas raportimeve tre të vrarët janë anëtarë të së njëjtës familje. Dyshohet që kryefamiljari ka vrarë bashkëshorten dhe djalin, e më pas ka qëlluar edhe veten.
Gazetari i Tëvë1, Lindrit Zejnullahu në një lidhje direkte tha se në bisedat prapa kamerave banorët e këtij fshati e përshkruanin dorasin e këtij akti makabër si njeri të qetë, por që sot kanë vërejtur sjellje të dyshimtë.
“Banorët e këtij fshati, prapa kamerave e përshkruanin dorasin si njeri të urtë, të qetë, veçse ata thanë se sot tek ai kanë vërejtur disa shenja të dyshimta në sjelljet e tij ndaj tyre. Po ashtu na është thënë se djali i cili dyshohet se është vrarë nga babai i tij kishte probleme shëndetësore, mendore”, tha gazetari i Tëvë1.
Lajmin për vrasjen e trefishtë për teve1.info e ka konfirmuar zëdhënësja e policisë, Flora Ahmeti, e cila tha se vdekja është konstatuar nga ana e ekipit mjekësor.
“Rreth orës 16:30 policia ka pranuar informatën për tre persona të pajetë në fshatin Rufc të Lipjanit. Menjëherë pas marrjes së informatës policia ka dalë në vendin e ngjarjes ku janë hasur tre trupa të pajetë. Vdekja e të cilëve është konstatuar nga ana e ekipit mjekësor “, tha ajo.
Ahmeti tha se policia ka nisur një hetim për rastin dhe rrethanat që karakterizojnë ngjarjen.
