Është ndërprerë seanca gjyqësore në rastin e vrasjes së Liridona Ademajt, derisa janë caktuar tri seanca për muajin korrik.
Ndërkohë, trupi gjykues ka aprovuar kërkesën e mbrojtjes për ekzaminim psikiatrik të Naim Murselit.
Kryetarja e trupit gjykues, gjyqtarja Fatime Dermaku ka bërë të ditur se do të urdhërohet Instituti i Psikiatrisë së Kosovës që brenda dy jave të realizojë ekzaminimin.
“Do të urdhërohet Instituti i Psikiatrisë së Kosovës që brenda dy jave të realizojë këtë ekzaminim, meqenëse tanë është aprovuar kërkesa e mbrojtjes për ekzaminim”, tha ajo.
Prokurorja e rastit, Javorka Perlinçeviq, ka propozuar që në këtë rast të dëshmojë, vëllai i Liridonës, mjeku ligjor Naim Uka, Jeton Binaku që i kishte huazuar veturën Granit Plavës dhe Valon Lukaj, i cili kishte strehuar Naim Murselin.
Më 15 janar Prokuroria Themelore në Prishtinë ka ngritur aktakuzë ndaj Naim Murselit, Granit Plavës, Kushtrim Kokallës dhe Tom Dodajt.
Në seancën e parë të mbajtur më 31 janar, tre të akuzuarit ishin deklaruar të pafajshëm, derisa Dodaj e pranoi fajësinë e ia kishte shitur armën.
