Gjykata e Apelit të Juridiksionit të Përgjithshëm ka konfirmuar masën e sigurisë “arrest në burg” për Elvis dhe Gjon Shkambin, si dhe për Banush Koxhajn, të akuzuar për përfshirje në vrasjen e gjyqtarit Astrit Kalaja më 6 tetor në të njëjtën godinë të drejtësisë.
Vendimi erdhi pas ankimit të Gjon Shkambit dhe Banush Koxhajt, të cilët kërkuan masa më të buta sigurie, por trupi gjykues i kryesuar nga gjyqtari Genti Shala rrëzoi kërkesat, raportojnë mediat në Shqipëri.
Ngjarja e paprecedent ndodhi gjatë një seance gjyqësore, ku Elvis Shkambi qëlloi me armë zjarri drejt gjyqtarit Kalaja dhe plagosi dy persona të tjerë.
Të tre të arrestuarit mbeten nën hetim për akuza të rënda, mes tyre “vrasje e funksionarëve publikë”, “vrasje në rrethana cilësuese” dhe “shpërdorim detyre” në rastin e Koxhajt.
