Kryetari i Klinës, Zenun Elezaj ka thënë se vrasja e dyfishtë në orët e mbrëmjes nuk ka tronditur vetëm familjen e dy të rinjve, por të gjithë vendin.
Elezaj ka shprehur ngushëllime për familjen e dy personave që mbeten sonte të vrarë.
“Me dhimbje e pikëllim të madh kam marrë lajmin për rastin e sotëm, ku mbetën të vdekur Rexhep dhe Albison Shlivova nga fshati Jashanicë. Ky lajm i papritur e i kobshëm tronditi thellë jo vetëm familjen e dy të ndjerëve, por na preku thellë të gjithëve. Në emrin tim dhe të komunës së Klinës i shpreh ngushëllime të sinqerta familjes Shlivova, miqve dhe të gjithë atyre që i kanë njohur Rexhepin dhe Albisonin”, thuhet tutje në shkrimin e Elezajt.
Ndryshe, dy persona janë vrarë pas të shtënave me armë zjarri, mbrëmjen e sotme në qytetin e Klinës.
Policia e Kosovës konfirmoi për Tëvë1, se lidhur me rastin është arrestuar një i dyshuar.
“Rreth ores 17:15 policia është njoftuar për të shtëna me armë zjarri në sheshin “Mujë Krasniqi” në një lokal sipas informatave të para një person është pa shenja jete vdekjen e ka konstatuar mjeku kujdestar, ndërsa një person tjetër është dërguar në emergjencë”, ka thënë zëdhënësi i policisë, Fadil Gashi./teve1.info/
