I akuzuari për vrasjen e Agonis Tetajt, Shaban Gogaj, doli edhe një herë para gjykatësit. Kjo pasi ky rast u rikthye për herë të dytë në Gjykatën e Apelit. Kjo për t’i trajtuar ankesat e palëve për këtë rast. Të zhgënjyer me zvarritjen e këtij procesi, u shprehën prindërit e viktimës, ndërsa pala mbrojtëse tha se dy herë epilogu i këtij rasti, ishte vrasje nga pakujdesia.
Me pranga në duar, u soll edhe një herë në gjykatore.
Është ky Shaban Gogaj, që për herë të dytë, u soll në Gjykatën e Apelit në Prishtinë.
Ky i fundit ishte gjetur dy herë fajtor nga Themelorja, për vrasjen nga pakujdesia të Agonis Tetajt.
E gjithë ngjarja kishte ndodhur me 23 shtator të vitit 2018 në Deçan.
Të enjten Gjykata e Apelit shqyrtoi sërish ankesat e palëve për këtë rast.
Të shqetësuar me gjithë këtë, u shprehën familjarit e të ndjerit, Agonis Tetajt.
“Prej fillimit kur ka ndodh ky rast, kam kërku me u vendos drejtësi, mas largu mrena 1 viti. Qe 6 vjet u banë, unë jam tu u maltretu nëpër seanca”, tha babai i Agonisit
Drejtësi për të birin e vrarë, kërkoi edhe nëna e Agonisit.
“Me u marrë një vendim këtu, mos mu en ma nëpër gjykata …”, u shpreh ajo.
Ndërkohë avokati i palës së dëmtuar, tha se në këtë rast ka pasur ndërhyrje të shumta.
“Besoj edhe shumica e popullatës, e ka zbehur besimin në drejtësi edhe pikërisht duke pasur parasysh këtë çështje juridiko-penale, pasi që ka pasur ndërhyrje të shumta nga persona që nuk ia duan të mirën drejtësisë”, tha avokati Berat Tmava.
Por, ndryshe po pretendon avokati mbrojtës i Shaban Gogajt.
Ky përsërit se në dy gjykimet e mëhershme epilogu ishte vrasje nga pakujdesia.
Madje tha se dorasi viktimën, e mban afër zemrës.
“Ky moment i lumturisë ishte dashuria e të akuzuarit Gogaj, që të kurorëzohej me fejesë dhe për këtë qerasi secilin nga shokët aty, përfshirë edhe tani të ndjerin që tani e mban afër zemrës, në krahum e tij si tatu përjetë”, tha avokati i Shaban Gogajt, Besnik Berisha.
Më 14 tetor 2022, Gjykata Themelore në Pejë kishte shpallur aktgjykim dënues ndaj të akuzuarit Shaban Gogaj, duke e dënuar me 7 vite e 6 muaj burgim për vrasje nga pakujdesia të Agonis Tetajt. Gjykim të njëjtë Themelorja shqiptoi edhe me 15 mars të vitit 2024.
