Presidentja e Kosovës, Vjosa Osmani, thotë se ndaj policit të vrarë dhe të plagosur në veri ka pasur sulm të planifikuar, orkestruar dhe që është ekzekutuar nga bandat kriminale serbe.
Osmani thotë se këto sulme e dëshmojnë fuqinë destabilizuese të bandave kriminale, të organizuara nga Serbia, raporton teve1.info
“Këto sulme dëshmojnë edhe njëherë fuqinë destabilizuese të bandave kriminale, të organizuara nga Serbia, të cilat prej shumë kohësh, siç është dëshmuar edhe me sulmet ndaj pjesëtarëve të KFOR-it, gazetarëve e qytetarëve, po e destabilizojnë Kosovën dhe rajonin”, thuhet në njoftimin e Zyrës së Presidencës.
Presidentja thotë se sulmet e organizuara kundër forcave të rendit të Republikës së Kosovës janë sulme kundër sovranitetit të Republikës së Kosovës.
“Përveç dënimit të ashpër të këtij agresioni të hapur të Serbisë ndaj Kosovës, pres që aleatët tanë ta mbështesin Kosovën në përpjekjen e saj për vendosjen e rendit dhe ligjit si dhe ruajtjen e sovranitetit në çdo pjesë të Republikës së Kosovës”.
Osmani i ka shprehur ngushëllime familjes së policit të vrarë, ku ka premtuar që autorët e këtyre “akteve terroriste” nuk do të mund t’i ikin drejtësisë.
“Familjes së policit të vrarë ju shprehim ngushëllime të thella dhe i sigurojmë se autorët e këtyre akteve terroriste nuk do të mund t’i ikin drejtësisë.
Ftoj të gjithë qytetarët, institucionet dhe subjektet politike që të qëndrojnë të bashkuar në këtë kohë kur po sfidohet hapur integriteti territorial, siguria dhe sovraniteti i Republikës sonë.
Si Presidente e Republikës kam besimin e plotë në djemtë dhe vajzat tona nga Policia e Kosovës”, thuhet tutje në njoftim.
Osmani ishte duke qëndruar në New York, ku ka anuluar të gjitha aktivitete e parapara për ditën e hënë dhe është nisur për në Kosovë./teve1.info/
