Ka votuar kandidati i VLEN-it nga opozita shqiptare ne Maqedoni të Veriut për president të këtij shteti, Arben Taravari, raporton teve1.info
Taravari ka votuar në shkollën “Bashkimi” në Gostivar, derisa është një nga shtatë kandidatët për presidnet të këtij shteti.
Në Maqedoni të Veriut sot po votohet për president, ku qytetarët e këtij shteti po vendosin për presidentin e tyre të ardhshëm.
Vendvotimet është paraparë të hapen në orën 7:00, ndërsa zgjatin deri në orën 19:00. Votohet në 3480 vendvotime në tërë Maqedoninë e Veriut me numër të përgjithshëm të votuesve të regjistruar në Listën zgjedhore prej 1.814.317.
Në këtë garë presidenciale, partia VMRO DPMNE nga opozita ka garuar me deputetën aktuale Gordana Siljanovska-Davkovën. Lidhja Social Demokrate në pushtet ka garuar me presidentin aktual, Stevo Pendarovski. Bashkimi Demokratik për Integrim ka garuar me ministrin e Punëve të Jashtme, Bujar Osmani, ndërsa opozita e bashkuar shqiptare me Arben Taravarin, kryetarin aktual të Gostivarit.
Pjesë e garës zgjedhore do të jetë edhe Maksim Dimitrievski, kryetari i komunës së Kumanovës, Stevçe Jakimovski, kryetari i komunës së Karposhit në Shkup dhe Biljana Vankovska, kandidate e partisë “E Majta”.
