Autori: Jona Kelmendi
Ekranet janë ndezur, por procesi i numërimit ende jo.
Ani pse gjithçka duket gati në sallën “1 Tetori” në Prishtinë, tavolinat janë vendosur, e kabllot janë shtrirë nëpër dysheme, numërimi nuk ka nisur.
Sipas Komisionit Qendror të Zgjedhjeve, problemi qëndron tek rrjeti elektrik, i cili po pengon funksionimin e sistemit dhe transmetimin e pamjeve për vëzhguesit.
“Procesi i numërimit dhe i aktiviteteve tjera janë duke u zhvilluar në 34 qendra komunale të votimit, në një ka përfunduar të hënën në mbrëmje ndërkaq në tri të tjera ky proces nuk ka nisur ende tani kur ora është 13:30 arsyet se pse nuk ka filluar procesi siç janë qendrat komunale në Prishtinë, Podujevë dhe Kllokot është për shkak të problemit që është shfaqur në rrjetin e dobët të internetit, ekranet të cilat janë të vendosur në qendrat komunale të veprimit janë vendosur për të shfaqur pamjet nga kamerat në të cilat prezantohen fletëvotimet nga procesi i numërimit”, ka thënë Elezi.
Megjithatë, Elezi sqaron se platforma elektronike e rezultateve po funksionon pa pengesa dhe se problemi nuk lidhet me të.
“Duhet ta sqarojmë se platforma elektronike e rezultateve është duke funksionuar mirë dhe nuk ka pasur ndonjë problem pra, sfida që është paraqitur nuk ka të bëj fare me platformën elektronike”, është shprehur tutje Elezi.
E i njëjti problem është paraqitur edhe në dy qendra të tjera komunale, në atë të Podujevës dhe në Kllokot.
Sipas Elezit, stafi i komisionit të zgjedhjeve, departamenti përkatës, është duke u marrë me këtë çështje dhe që shumë shpejtë ky problem do të sanohet në mënyrë që edhe në këto tri qendra komunale të filloj procesi i numërimit.
