Zëvendësministri i Pushtetit Lokal, Arbër Vokrri ka thënë se ura e Ibrit do të hapet gjatë kësaj vere.
Ai ka thënë se nuk mund të jap datë të saktë, por se situata po përcillet me kujdes.
I pyetur për një deklaratë të dhënë më herët se ura do të hapet në gusht ai ka thënë se ky është qëllimi se ashtu do të bëhet.
“Vera shtrihet edhe në shtator, natyrisht sa më herët është më mirë. Është duke u përcjellë me kujdes situata, nuk ka potencial për trazira, nuk ka as sinjale të qytetarëve serbë, përjashtimisht përkrahëseve të Listës Serbe që edhe ashtu e kanë hupur ndikimin. Vetëm pritet momenti më i përshtatshëm që të hapet qarkullimi për vetura”, ka thënë Vokrri në emisionin “Këndi i Debatit” në Tëvë 1.
Duke folur për protestën e sotme nga serbët në veri në kundërshtim të hapjes së urës së Ibrit, ai ka thënë se kjo protestë, nuk përfaqëson kundërshtimin e qytetarëve serb, por të përfaqësuesve të Listës Serbe dhe familjarëve të tyre.
“Nuk mund të kualifikohet si reagim i qytetarëve serb, aty pamë figura të udhëheqjes së Listës Serbe dhe nga 45- 50 mijë banorë të veriut, kishin arritur t’i tubojnë 200-300 veta. Që është edhe një dëshmi e asaj që kemi thënë se Lista Serbe ka hup epitetit e përfaqësuesve serb , sidomos në veri”, ka thënë Vokrri.
Ndryshe, paralajmërimi i Qeverisë së Kosovës për hapjen e urës së Ibrit ka ngjallë reagim të BE-së dhe ShBA-së, të cilët janë shprehur kundër.
