Deputetja e PDK-së, Vlora Çitaku, ka reaguar pas konferencës së sotme të kryeministrit në detyrë dhe kryetarit të VV-së, Albin Kurti, duke thënë se ajo duhej të mbahej në selinë e partisë së tij dhe jo në ndërtesën e Qeverisë.
Çitaku ka theksuar se për nëntë muaj, Kurti kishte thënë se i ka numrat për qeverinë, ndërsa sot, sipas saj, me “nënqeshje ironike”, pranoi se dikur i kishte pasur votat, por tani nuk i ka më.
“Sot, me nënqeshje ironike, pranoi se i paska pasur ‘verës’, me votim të fshehtë, por tani nuk i paska më. Ndërkohë, Kosova është e izoluar, nën sanksione, me ekonomi të rënduar e me çmime të papërballueshme për familjet tona”, ka thënë Çitaku
Sipas Çitakut, qytetarët tashmë e njohin Kurtin dhe dinë çfarë sjell qeverisja e tij:
“Njeriu që nuk ka lënë vlerë pa nëpërkëmbur e njeri pa fyer, sot fliste sërish për nevojën që ai të fitojë ‘referendumin’, jo zgjedhjet. Sepse për të, qeverisja ka kuptim vetëm nëse sundon i vetëm. Po e kemi parë tashmë çfarë do të thotë sundimi i tij. Pesë vite me pushtet absolut. Rezultatet? Izolim, varfërim, ikje masive të qytetarëve tanë.”
Çitaku ka kritikuar edhe mënyrën se si Kurti i percepton qytetarët:
“Sipas tij, shteti është skenë teatri dhe qytetarët janë publik që duhen argëtuar me shfaqjen e radhës.”
