Analisti politik Azem Vllasi, në emisionin “Info Nata” në Tëvë1, ka komentuar dështimin e seancës së sotme, ku Kuvendi nuk e votoi mandatarin Glauk Konjufca, duke bërë që të dështojë formimi i qeverisë “Konjufca 1”. Ai tha se skena politike ka rënë në një nivel të mjerueshëm dhe se asnjëra palë nuk ka interes për vendin, por vetëm për pushtet.
“Përgjithësisht, ajo që pamë sot ishte një gjendje e mjerueshme. Blloqet e kundërshtuara partiake po çojnë inate në mes veti dhe harxhojnë fjalë se si të mos ecë Kosova përpara. U panë të pozicionuar ashtu që nuk lejojnë asnjë promil në interes të Kosovës”, tha Vllasi.
Ai shtoi se politika pa kompromis është politikë pa interes për vendin.
“Një politikan që nuk është në gjendje të bëjë kompromise në interes të popullit dhe shtetit, do të thotë se nuk është në interes të askujt përveç pushtetit. Dhe këtë po e shohim te të dy blloqet”, u shpreh analisti.
Vllasi vlerësoi se, pavarësisht se qeveria Kurti nuk arriti t’i siguronte votat, disa deputetë mund ta votonin kandidatin e ri, Glauk Konjufcën.
“Edhe pse nuk i mori votat qeveria Kurti, ka mundur ndonjë deputet t’i japë votën për ta zgjedhur një qeveri të udhëhequr nga Konjufca. Nuk besoj se në të dy blloqet del dikush më i mençur se Konjufca”, deklaroi ai.
Vllasi e përshkroi situatën politike si të degraduar, ku palët janë të përqendruara te përplasjet e brendshme.
“Skena politike ka rënë në këtë nivel: merre njërin, godite tjetrin. Ishte situatë e mjerueshme. Tani askush nuk ka propozim çfarë më tutje, vetëm thonë ‘zgjedhje të jashtëzakonshme’”, tha ai.
Vllasi ngriti edhe një dilemë të fortë për rezultatin e zgjedhjeve të mundshme.
“Po nëse shkojmë në zgjedhje, kush garanton që marrin prapë më shumë vota? Kush garanton që nuk kthehemi te e njëjta situatë përsëri? Mund të përfundojmë pikërisht aty ku jemi sot”, theksoi ai.
