FIFA ka zbuluar ekipin e saj prej 117 gjyqtarësh të ndeshjeve për Kupën e Botës për Klube dhe tha se gjyqtarët do të mbajnë kamera trupore dhe do të zbatojnë rregulla më të rrepta për portierët që humbin kohë në turneun që do të zhvillohet në Shtetet e Bashkuara.
Komiteti i Gjyqtarëve të FIFA-s emëroi zyrtarët nga 41 shoqata anëtare – 35 gjyqtarë, 58 gjyqtarë ndihmës dhe 24 gjyqtarë të ndeshjeve video – për ngjarjen e 14 qershorit deri më 13 korrik.
Kamerat në trup do t’u ofrojnë tifozëve pamje të aksionit në fushë, tha FIFA, ndërsa portierët që e mbajnë topin për më shumë se tetë sekonda tani do të ndëshkohen me goditje nga këndi në vend të goditjeve të lira indirekte.
“Ne mendojmë se është një shans i mirë për t’u ofruar shikuesve një përvojë të re, për sa i përket imazheve të marra nga një perspektivë, nga një kënd shikimi, i cili nuk është ofruar kurrë më parë”, tha Pierluigi Collina, kryetar i Komitetit të Gjyqtarëve të FIFA-s.
“Gjithashtu ka një qëllim për sa i përket trajnimit të gjyqtarëve sepse, sigurisht, të kesh mundësinë për të parë atë që sheh gjyqtari është e rëndësishme për të gjithë”, thuhet tutje në njoftimin e FIFA-s.
Collina theksoi natyrën historike të emërimeve për turneun e zgjeruar që përfshin 32 ekipe nga të gjashtë konfederatat e FIFA-s dhe që përfshin 12 stadiume në 11 qytete pritëse në SHBA.
“Gjyqtarët e përzgjedhur janë ndër ata që kanë privilegjin të jenë pjesë e kësaj për herë të parë, kështu që jam i sigurt se të gjithë zyrtarët e ndeshjes do të jenë të emocionuar”, tha ai.
“Ne vijmë nga performanca të standardeve të larta të ofruara gjatë turneve të fundit të FIFA-s. Pra, standardi është më i lartë dhe kur e vendos standardin më lart është më e vështirë të mbash standardin. Por ne po punojmë shumë fort dhe ‘Ekipi Një’ do të japë një kontribut të fortë në suksesin e këtij kompeticioni emocionues.”
