Sekretari i Përgjithshëm i NATO-s, Jens Stoltenberg, më 20 nëntor ka qëndruar në Kosovë, në kuadër të një turi në disa shtete të rajonit, ku shefi i aleancës ushtarake perëndimore do të zhvillojë takime me krerët e shteteve.
Njohësi i Sigurisë, Fadil Kajtazi, vlerësoi që vizita e Stoltenbergut mund të jetë sinjal për shtetet e rajonit, që NATO dhe Perëndimi po e monitorojnë gjendjen nga afër.
“Ndoshta është një sinjal për shtetet e rajonit që NATO dhe perëndimi janë duke e monitoruar nga afër gjendjen, e po ashtu kanë gatishmëri që kjo gjendje të mbahet nën kontroll dhe të mos eskalojë. Çdo ditë që po kalon në raportet Kosovë-Serbi, pazari i Kosovës në negociata është duke rënë. Fajet i ka politika aktuale e cila e ka futur Kosovën në konflikt me perëndimin”, deklaroi Kajtazi në emisionin “Ditari”.
Madje, Kajtazi tha se Qeveria aktuale duhet të veprojë me shpejtësi për ta kthyer besimin te Bashkimi Evropian, NATO dhe Shtetet e Bashkuara të Amerikës.
“Në qoftë se Bashkësia Ndërkombëtare sillet me këtë neutralitet të heshtur, siç është sjellë në rastin Banjskë, situata mund të përkeqësohet”, shtoi tutje Kajtazi në Tëvë1.
Kujtojmë se gjatë vizitës në Prishtinë, e cila është në kuadër të një turi ballkanik, Stoltenberg tha se shtimi i pranisë ushtarake në Kosovë me 1.000 trupa, që përbën vendosjen më të madhe në vitet e fundit të aleancës, tregon se sa seriozisht e merr aleanca dhunën që shpërtheu muajve të fundit në Kosovë.
“Ne, vërtet, po investojmë në sigurinë e këtij rajoni, sepse siguria e njerëzve në këtë rajon, stabiliteti në këtë rajon, ka rëndësi për sigurinë tonë”, tha ai./teve1.info/.
