Ministri i Shëndetësisë në detyrë, Arben Vitia ka deklaruar se sulmi i së mërkurës ndaj ushtruesit të detyrës së drejtorit të Qendrës Klinike Universitare të Kosovës (QKUK), Osman Hajdari, do të marrë përgjigjen që e meriton.
Vitia ka thënë se kushdo që ka provuar të vendosë në sprovë shtetin dhe institucionet e vendit do të dështojë.
Sipas tij nuk ka kthim pas sepse asnjë prej tyre nuk do ta lejojë këtë në asnjë rrethanë.
“Kushdo që ka provuar të vendosë në sprovë shtetin dhe institucionet e vendit do të dështojë. Sulmi ndaj U.d. Drejtorit të QKUK-së do të marrë përgjigjen që meriton. Nuk ka kthim pas sepse asnjë prej nesh nuk do ta lejojë këtë në asnjë rrethanë”, ka shkruar Vitia në Facebook.
Mëngjesin e së mërkurës në parkingun e administratës së QKUK-së ka shpërthyer vetura private e ushtruesit të detyrës së drejtorit të QKUK-së, Osman Hajdari.
Në njoftimin për media është thënë se dëmtimi ka ndodhur në rrethana ende të panjohura, në kohën kur po bëheshin përgatitjet për fillimin e mbledhjes së rregullt të Bordit Drejtues të Shërbimit Spitalor dhe Klinik Universitar të Kosovës (ShSKUK), e cila ishte paraparë të mbahej në hapësirat e administratës qendrore të ShSKUK-së.
Zëdhënësja e Policisë së Kosovës, Flora Ahmeti, ka thënë për teve1.info se nga shpërthimi nuk ka të lënduar, por vetëm dëme materiale.
Ndërkaq, Hajdari në reagimin e tij pas ngjarjes ka thënë se ky akt lidhet me punën e tij zyrtare si ushtrues detyre i drejtorit.
“Kam qindra mesazhe, të cilat veç më shumë më inkurajojnë me punua dhe me drejtua institucionin. Në jetën time private nuk kam asnjë problem as të kaluarën as tash. Konsideroj që krejt ky akt është i ndërlidhur me punën time zyrtare, me punët e mira dhe vendosshmërinë për me vendos rregull, rend në QKUK dhe ndoshta kjo punë i pengon grupeve të ndryshme të interesit, qoftë financiar, qoftë grupeve tjera që ndoshta edhe kanë lidhje me zyrtarë të QKUK-së apo edhe të tjerë, por jemi shumë të vendostë që të vazhdojmë me punët e mira. Këto grupe nëse i kanë zgjedhur këto metoda dhe këto mjete me na frikësua e kanë shumë gabim”, deklaroi ai./teve1.info/
Vetura e ud. së drejtorit të QKUK-së dëmtohet në rrethana të paqarta
Shpërthimi i veturës, Hajdari: Akti është i lidhur me detyrën time zyrtare
