Ministri i Shëndetësisë, Arben Vitia, ka bërë të ditur se kërkesat e stafit me qellim të rritjes së performancës të Inspektoratit Shëndetësor janë realizuar.
Vitia ka njoftuar se nga muaji shtator të gjithë inspektorët do marrin shtesa prej 250 eurove.
“Duke e pasur parasysh rëndësinë vitale të punës së Inspektoratit, me prioritet kam trajtuar të gjitha kërkesat të cilat do të ndikojnë në performancën e këtij institucioni për mbrojtjen e shëndetit publik. Nga muaji shtator, të gjithë inspektorët do të marrin shtesa prej 250 eurove. Këto shtesa do të jenë në vazhdimësi. Po ashtu, në fazën finale është procesi i rekrutimit të 33 inspektorëve, prej të cilëve 25 në Inspektoratin Shëndetësor, ndërsa tetë në Inspektoratin Farmaceutik. Planifikimet janë që të krijohen 42 pozita të reja, të cilat do të rrisin dinamikën e punës dhe cilësinë e performancës”, tha ministri Vitia gjatë takimit me stafin e Inspektoratit Shëndetësor dhe Inspektoratin Farmaceutik.
Ai kërkoi angazhim të shtuar, ndërsa tha se nuk do të ketë tolerancë në rastet kur ekziston dyshimi për drejtësi selektive.
“Me rritjen e numrit të inspektorëve dhe të shtesave në pagë, si dhe me plotësimin e kushteve të punës, presim angazhim maksimal në zbatimin e ligjit për të gjithë njëjtë”, tha ai.
Gjatë këtij viti janë realizuar 635 inspektime, prej të cilëve 115 gjatë muajit të kaluar nga Inspektorati Farmaceutik./teve1.info/
