Seanca e parë e Kuvendit të Kosovës, sot në rend dite ka shqyrtuar propozimin e amandametit kushtetues, që ka të bëjë me përfshirjen e konventës së Kombeve të Bashkuara për të drejtat e personave me aftësi të kufizuara në nenin 22 të Kushtetutës.
Me ç’rast, Ministri i Shëndetësisë, Arben Vitia, u bëri thirrje deputetëve ta votojnë këtë ndryshim kushtetues.
“Vitin 2022 e patëm shpallur si vitin e personave me aftësi të kufizuara. Respektimi i të drejtave dhe lirive themelore të njeriut të garantuara me Kushtetutë dhe instrumente ndërkombëtare për të drejtat e njeriut zbatohen ndaj të gjithëve pa dallim. Neni 22 i Kushtetutës së Republikës së Kosovës liston instrumentet ndërkombëtare për mbrojtjen e të drejtave të njeriut që aplikohen drejtpërdrejt në sistemin tonë juridik dhe kanë supremaci mbi legjislacionin vendor. Sot po propozohet përfshirja e konventës së Kombeve të Bashkuara për të drejtat e personave me aftësi të kufizuara në listën e instrumenteve ndërkombëtare, për mbrojtjen e të drejtave të njeriut të garantuara me Kushtetutë si amandament kushtetues. Pra, një e drejtë që është ndërkombëtarisht e njohur, të normohet edhe me Kushtetutën e Kosovës duke bërë amandamentimin e saj”, tha Vitia para deputetëve.
Më tej, Vitia tha se sistemi kushtetues i Kosovës, i ka vënë vetes për detyrë parësore që t’u përmbahet detyrimeve të tij, sipas të drejtës ndërkombëtare duke u dhënë prioritet traktateve ndërkombëtare rajonale.
“Konventa e OKB’së për të drejtat e personave me aftësi të kufizuara fuqizon pasqyrën kushtetuese dhe ligjore për sa i përket mbrojtjes dhe avancimit të të drejtave të personave me aftësi të kufizuara në të gjitha fushat. Andaj, marrë parasysh sa i rëndësishëm është ky amandamentim, ju lutem dhe ju ftoj ta votoni këtë ndryshim kushtetues”, theksoi i pari i MSH-së”, ka theksuar tutje Vitia./teve1.info/.
