Kandidati për deputet në Parlamentin e Serbisë në zgjedhjet e 17 dhjetorit, Visar Mehmeti, tha se është ftuar në takim nga kryeministri Albin Kurti.
Megjithatë, ai tha se nuk ka marrë pjesë në këtë takim pasi sipas tij nuk është ftuar edhe kreu i partisë, Shqiprim Arifi.
“Po, më kanë ftuar mua si kandidat potencial, mirëpo nuk është ftuar kreu i subjektit ashtu siç janë ftuar krerët e partive tjera, kështu që unë nuk e kam pa të arsyeshme me marrë pjesë në takim, duke e ditur se subjektet tjera janë të përfaqësuara nga krerët e tyre”, ka deklaruar ai.
Ftesën e Mehmetit e ka konfirmuar edhe zëdhënësi i Qeverisë së Kosovës, Përparim Kryeziu, i cili tha se ftesa ka qenë për kandidatët për deputet.
“Po ka qene i ftuar. Ftesa dhe takimi ka qenë për kandidatët për deputet”, ka thënë Kryeziu.
