Salla e gjykimit ishte më e mbushur se zakonisht.
Në dy rreshtat e parë të ulëseve në anën e majtë, zënë vend viktimat dhe të mbijetuarit nga masakra e Izbicës.
Kjo pasi që gjykimi në rastin e masakrës së Izbicës pritet që së shpejti të marrë epilog, ndaj palët dhanë fjalët e tyre përfundimtare.
I pari që mori fjalën ishte prokurori special Ilir Morina, i cili tregoi disa nga rastet ku viktimat e kanë parë Muhamet Alidemajn, i cili akuzohet se ka marrë pjesë në vrasjen e civilëve në masakrën e Izbicës.
Madje, prokurori Morina tregoi se si disa prej dëshmitarëve e kishin identifikuar Alidemajn, qoftë në këtë sallë, në prokurori apo edhe përmes medieve.
Për Alidemajn, prokurori kërkoi që të shpallet fajtor. Edhe përfaqësuesi i viktimave kërkoi dënim konform ligjit për Alidemajn, njëjtë siç bënë edhe viktimat.
Kur i erdhi radha mbrojtjes së Alidemajt, avokati Millosh Deleviq tha se nuk e mohojnë se është kryer krimi.
Në këtë proces gjyqësor janë dëgjuar rreth 21 dëshmitarë, derisa aktgjykimi pritet të shpallet të premten e 12 korrikut.
