Ish-sulmuesi Christian Vieri thotë se eliminimi i hershëm i Italisë në “Euro 2024” është faji i të gjithëve dhe insiston se “axurrët” duhet gjithmonë të përpiqen për triumf në turne të mëdhenj.
Italia si kampione në fuqi, u eliminua në 1/8 e finales të “Euro 2024”. U mposht 2:0 nga Zvicra për t’i dhënë fund pjesëmarrjes në këtë turne, në të cilin regjistroi edhe një humbje, një fitore e një barazim.
Personalisht, Vieri ka thënë se ka pritur më shumë nga Italia por që është zhgënjyer me atë se çfarë ka treguar në fushë ekipi i trajnerit Luciano Spalletti.
“Kam pritur shumë më shumë, sikurse gjithë të tjerët. Ishte një paraqitje shumë e dobët dhe për këtë fajin e kanë të gjithë pasi ka të bëjë me grupin dhe jo persona të caktuar”, është shprehur Vieri.
Ai ka luajtur për Italinë prej vitit 1997 deri në vitin 2005, ku ka regjistruar 49 paraqitje dhe ka shënuar 23 gola.
Në “Euro 2024”, Italia ishte pjesë e Grupit B së bashku me Spanjën, Shqipërinë dhe Kroacinë.
