Shtëpia e familjes Kastrati në Obrançë të Podujevës, ishte cak i hajnave të dielën në mbrëmje.
Më të perënduar dielli, hajnat mësynë shtëpinë e kësaj familje.
Rreth orës 21 të se dielës, në familjen Kastrati në Obrançë të Podujevës, hajdutët përmes dritareve kanë hyrë brenda shtëpisë ku kanë vjedhur një shumë të konsiderueshme të parave si dhe stoli ari.
Familjarët nuk kanë dashur të flasin për shkak të hetimeve, por kanë bërë të ditur se ngjarja ka ndodhur kur askush nuk ishte në shtëpi.
Policia e Kosovës ka nisur hetimet për këtë rast.
“Në këtë fazë nuk ka ndonjë të arrestuar, ndërkaq policia në koordinim me prokurorin e shtetit ka iniciuar një hetim në drejtim të veprës penale “Vjedhja e Rëndë” dhe në mënyrë aktive po heton rrethanat që karakterizojnë ngjarjen”, thuhet nga Policia.
Në lëvizje është vënë edhe prokuroria.
“Prokurori i Shtetit ka autorizuar policinë në ndërmarrjen e veprimeve të nevojshme hetimore, drejt sqarimit të rrethanave dhe identifikimit të autorëve të mundshëm të përfshirë në këtë rast”, ka thënë zëdhënësja e Prokurorisë në Prishtinë, Laureta Ulaj
Sipas burimeve të Tëvë1, familjes Kastrati iu janë vjedhur afër 4 mijë euro të holla, si dhe ari me vlerë rreth 40 mijë euro.
