Ahmeti tha se kryetari i Obiliqit, Xhafer Gashi ka marrë vendime të jashtë ligjshme, e kjo sipas tij, i ka shkaktuar dëm financiar komunës.
“Pas një kohe shumë të gjatë kemi arritur të sigurojmë të dhëna të mjaftueshme që na ofrojnë dëshmi se në këtë projekt ka keqpërdorime të shumta. Kallëzimi ynë penal ka kryesisht të bëjë me shkaktimin e dëmit financiar ndaj Komunës së Obiliqit, nxjerrjen e vendimeve të jashtëligjshme, kompromise të jashtëligjshme si dhe fshehje të provave publike. Konsiderojmë se kryetari i komunës ka marrë vendime të jashtëligjshme duke themeluar komisione mbi komisione”, tha Ahmeti në emisionin “Ditari”,
Tutje, Ahmeti bëri të ditur se ish-menaxherja e projektit për ndërtimin e bibliotekës në qytet u ka ofruar fakte të cilat dëshmojnë presionin që ka pasur.
“Qysh në fillim të projektit për ndërtimin e bibliotekës në qytet, kryetari i komunës ka nxjerrë një vendim dhe ka emëruar një menaxhere të projektit. Mirëpo, menaxherja në fjalë, gjatë ushtrimit të detyrës, ka pasur probleme të shumta. Këto probleme i ka ngritur vetë ish-menaxherja e këtij projekti duke kërkuar edhe dorëheqje nga ai pozicion. Ajo na ka ofruar fakte të shumta që ka pasur presione nga operatori ekonomik dhe nga Komuna e Obiliqit”, tha Ahmeti në Tëvë1.
Kujtojmë se Lëvizja Vetëvendosje ka ngritur padi ndaj kryetarit të Obiliqit, Xhafer Gashit.
Vetëvendosje, në një shkrim në faqen e tyre zyrtare në ‘Facebook’, kanë thënë se kryetari Gashi ka bërë disa keqpërdorime me pronën dhe paratë publike./Tëvë1.info./