Lëvizja Vetëvendosje ka njoftuar se do të mbajë një konferencë për media sot në orën 10:30, gjysmë ore para fillimit të tentativës së 45-të për konstituimin e Kuvendit të Kosovës. Konferenca do të mbahet në hollin pranë Sallës së Grupit Parlamentar të Vetëvendosjes.
Arsyet e kësaj konference nuk janë bërë të ditura, ndërsa ajo zhvillohet në një moment kyç për procesin e konstituimit, i cili tash e tre muaj është i bllokuar.
Që nga mbajtja e zgjedhjeve më 9 shkurt, Vetëvendosja ka dështuar të sigurojë shumicën e nevojshme parlamentare për të përmbyllur fazën e konstituimit të Kuvendit. Ngërçi ka mbetur në pikën e zgjedhjes së kryetarit dhe nënkryetarëve të Kuvendit, meqë kandidatja e Vetëvendosjes, Albulena Haxhiu, nuk ka arritur të sigurojë 61 votat e nevojshme në votim të hapur.
Si rrjedhojë, Vetëvendosja po insiston në votim të fshehtë, një propozim që është kundërshtuar nga partitë e tjera parlamentare.
Ndërkohë, Gjykata Kushtetuese ka përcaktuar një afat 30-ditor për përfundimin e seancës konstitutive, i cili skadon më 22 korrik. Me afatin që po afrohet, presioni ndaj deputetëve për të arritur një zgjidhje është në rritje.
