Kandidati për kryetar të Pejës nga Lëvizja Vetëvendosje, Taulant Kelmendi, ka dërguar një ofertë zyrtare për bashkëpunim kryetarit të AAK-së në këtë qytet, Ali Berisha.
Kelmendi në një postim në Facebook ka theksuar se qeverisja e Pejës nuk mund të mbetet më e ndërtuar mbi pazaret politike dhe interesat e ngushta të pushtetit.
“Sot, si kandidat për kryetar të Komunës së Pejës, i kam dërguar një ofertë për bashkëpunim kryetarit të AAK-së në Pejë, Dr. Ali Berisha. Peja nuk mund të qeveriset më nga pazaret e fshehta dhe llogaritë e ngushta të pushtetit, prandaj jemi transparent në këtë rrugëtim”, tha Kelmendi.
Ai shtoi se Vetëvendosje është e gatshme të marrë përgjegjësi për qytetin, duke vendosur në qendër punën, drejtësinë dhe interesin e qytetarit.
Kelmendi ka theksuar se koha e varësisë nga pazaret me Lista Serbe dhe Gorazhdecin duhet të marrë fund.
Raundi i dytë i zgjedhjeve lokale në Pejë është caktuar për më 9 nëntor, dhe Kelmendi shpreh optimizëm për fitoren duke u bazuar tek mbështetja e qytetarëve.
“Më 9 nëntor fiton Peja, sepse jemi BASHKË me qytetarët që e votuan ndryshimin”, përfundoi ai.
