Lëvizja Vetëvendosje ka bërë homazhe në nderim të tre fëmijëve që humbën jetën në lumin Ibër para 20 viteve.
Përveç tyre, Vetëvendosje ka nderuar edhe 19 qytetarët që mbetën të vdekur në organizimin e protestës paqësore më 17 mars, të cilët u mblodhën për të kërkuar drejtësi për vdekjen e tre fëmijëve.
Përmes një postimi, VV ka shkruar se këto dy ngjarje s’do t’i harrojnë kurrë, kështu duke kërkuar përherë vendosjen e drejtësisë për këto krime.
“20 vjet më parë, në Çabër të Mitrovicës, buzë lumit Ibër, tre fëmijë, Egzon Deliu, Avni Veseli, dhe Florent Veseli po luanin duke ndjekur shota të egra. Fillimisht një serb që po korrte tallën aty fillon t’i fyej, e më pas një grup tjetër serb që i bashkohen atij me sharje, ndërsejnë qentë e tyre drejt fëmijëve të cilët të frikësuar fillojnë të ikin dhe hyjnë në lumin Ibër duke humbur tragjikisht jetën e tyre. Për të bërë homazhe në nderim e kujtim të tre fëmijëve që humbën jetën tragjikisht sot në Çabër ishte një delegacion i Lëvizjes VETËVENDOSJE! i prirë nga Sekretari Organizativ, Alim Rama së bashku me deputetë, aktivistë e anëtarë të Qendrës sonë. në Mitrovicë. Data 16 mars, shënon një ditë e zezë për Mitrovicën dhe gjithë Kosovën. Drejtësia për ngjarjen tragjike, vrasjen e tre fëmijëve e më pas edhe e qytetarëve të tjerë, ende nuk është vënë. Ne nuk do e harrojmë kurrë dhe do të kërkojmë përherë vendosjen e drejtësisë për këto krime”, thuhet në postimin e tyre./teve1.info/.
