Janë gjësendet që arritën t’i shpëtonin.
E të gjitha, u detyruan t’i grumbullonin në një dhomë të vetme.
Por, më keq, e pësuan pjesa tjetër e pajisjeve.
Është kjo gjendja më të cilën po përballet, familja Demiri në Kodrën e Trimave në Prishtinë.
E gjitha kjo, si pasojë e vërshimeve të fundit në kryeqytet.
Sipas kryefamiljarit, Hamit Demiri, niveli i ujit arriti në mbi një metër.
“E rëndë është. Në shtëpi, në atë pjesën tjetër kam qenë, fëmijët veç i kam vendos mbi shtrat i kam thanë rrini. Valla, diku përmbi një metër e gjysmë, deri në dritare ka qenë uji. Këtu e kam qelë këtë shaktë, ka depërtuar uji”, shpreh Demiri.
Në familjen prej gjashtë anëtarësh, i punësuar është vetëm djali i 72 vjeçarit.
Prandaj, Demiri thotë se rimëkëmbja është goxha e vështirë, pasi po përballen edhe me probleme shëndetësore në familje.
“Makinën, frigoriferin, fshesën e rrymës qysh ka qenë komplet shtëpia, krejt janë dëmtuar. Veç dhomën e fëmijëve e kam blerë 800 euro vetëm shtratin dhe dollapët, diku 2000 apo 3000 mijë euro, parketi, por s’kemi çka me bë….gruan e kam të sëmurë..”, ka thënë tutje Demiri.
Kryefamiljari, thotë se është në pritje të një përgjigje nga komuna, për ta tejkaluar këtë gjendje.
“Veç në atë sallon edhe në një dhomë tjetër, edhe aty është myk si ka hi uji në çdo anë. Na ka premtuar më shkua në banesë. Kom pranuar, i kam vendos dokumentet për një banesë tash kur më japin nuk e di. A jo me dal s’kam dal ku me shkua me këta fëmijë”, theksoj Demiri.
E në Komunën e Prishtinës, thonë se e kanë kontaktuar këtë familje.
“Çdo familje e cila ka qenë dhe është vlerësuar se nuk i plotëson kushtet për jetës në atë shtëpi, ne kemi ofruar ndihmë në gjetjen e banesës. Pra çdo familje që ka kërkuar ndihmë ne kemi ofruar që t’i strehojmë në banesa dhe t’i bëjmë pagesat e qeras mujorë në kohë të pacaktuar, domethënë deri sat ë përmirësohen kushtet e banesës apo shtëpisë në të cilën kanë jetuar. Ne qëndrojmë mbrapa kësaj, ne kemi evakuuar disa familje, e disa të tjera nuk kanë dashur kanë refuzuar nuk kanë mundur të gjejnë banesa”, ka thënë Fushtica.
Nga kjo drejtori, thanë për tëvë1, se janë të gatshëm t’i dalin në ndihmë familjeve që kanë pësuar nga vërshimet apo fatkeqësitë natyrore.
