Uji ka depërtuar në shumë shtëpi në fshatin Kuk të Dragashit.
Madje, qëndrimi brenda tyre është i vështirë ani pse kanë filluar pastrimin.
E këto vërshime rrezikojnë edhe përhapjen e sëmundjeve të ndryshme.
“Po mundësia ekziston çdo herë që të shpërndahet ndonjë sëmundje, veçanërisht ato që përhapen përmes rrugëve fekaloare siç është sëmundja e duarve të pa pastra për shkak se kontaminohet uji, kontaminohet ushqimi. Në këto rrethana rekomandohet që uji të vlohet të mos përdoret uji i cili është aktualisht në përdorim, ndërsa sa i përket ushqimit duhet të pastrohen mirë”, tha infektologu Shemsedin Dreshaj.
E vërshime të tilla si në Dragash, pritet që të rriten në vitet në vijim.
“Sipas të gjithave rastet e tilla kanë me u shpeshtu në vitet në vijim, pasojat e ngrohjes globale, kanë me pësu më së shumti shtetet në zhvillim të mos them të varfra, si rasti i Kosovës. Të cilave ju mungon infrastruktura e rregullt”, tha profesori i mjedisit Sami Makolli.
Kryetari i Dragashit kërkoi që banorët të mbajnë më pastër lumin dhe të mos hedhin mbeturinat, ani pse kishte ankesa nga banorët për pastrimin e tij nga pushteti lokal.
“Lumenjtë duhet me u mbajt vet, duhet me mbajt pastër, mos me gjuajt mbeturinat dhe mos me uzurpu shtratin e lumit”, tha Behxhet Xheladini.
Përveç Dragashit, gjatë kësaj jave si pasojë e reshjeve të shiut, vërshime pati edhe në qytete të tjera.