“Vergangenheitsbewältigung” – Një fjalë në gjuhën gjermane e përmendi sot kryeministri Albin Kurti gjatë fjalimit të tij në Kuvendin e Kosovës, ku foli për planin evropian të cilin e ka pranuar.
Ndërkohë, kryetari i Partisë Demokratike të Kosovës dhe deputeti Memli Krasniqi, fillimisht i tha se nuk kishte faj që nuk e shqiptoi mirë.
“Fjala jashtëzakonisht interesante, s’ka faj kryeministri që nuk mundi me e shqiptu edhe për gjermanët besoj që është zorë, se është fjalë e gjatë”, tha ai.
Sipas Krasniqit, kjo fjalë përdoret në diskutimin publik që një shoqëri e bën për “çështjen e rëndë në të cilën ka kaluar””, tha ai.
Krasniqi shtoi se gjermanët e përdorin këtë fjalë për trajtimin e historisë së tyre të nazizmit.
“Gjermanët e kanë përdorë këtë fjalë që kryeministri e përmendi për me e trajtu historinë e tyre të nazizmit dhe nuk është një fjalë që lidhet me kontekstin tonë aktual”, ka thënë ai gjatë fjalës së tij në Kuvendin e Kosovës.
Ndërkohë, për temin “Vergangenheitsbewältigung”, Kurti tha se nuk nënkupton harresën, por ballafaqimin me të kaluarën.
