Forcat amerikane kanë sekuestruar një anije cisternë nafte në brigjet e Venezuelës, akt të cilin qeveria e këtij vendi e quajti “një akt piraterie ndërkombëtare”.
Trump e ka konfirmuar operacionin të mërkurën, duke thënë: “Sapo kemi sekuestruar një tanker në bregdetin e Venezuelës – një tanker i madh, shumë i madh, më i madhi i sekuestruar ndonjëherë në fakt.”
“U sekuestrua për një arsye shumë të mirë”, shtoi presidenti amerikan, duke refuzuar të thoshte se kujt i përkiste anija.
Pam Bondi, prokurorja e përgjithshme e SHBA-së, postoi pamjet e sekuestrimit në X. Videoja e paqartë dhe e paklasifikuar 45-sekondëshe tregon forcat amerikane duke u ulur në anijen cisternë nga një helikopter.
Në një deklaratë shoqëruese, Bondi tha se FBI-ja, Hetimet e Sigurisë Kombëtare dhe Roja Bregdetare e SHBA-së, me mbështetjen e Departamentit të Mbrojtjes, kishin “ekzekutuar një urdhër sekuestrimi për një tanker nafte bruto të përdorur për të transportuar naftë të sanksionuar nga Venezuela dhe Irani”.
Ajo tha se cisterna ishte sanksionuar nga SHBA-ja për “shumë vite” për shkak të “përfshirjes së saj në një rrjet të paligjshëm të transportit të naftës që mbështet organizatat e huaja terroriste”.
Sekuestrimi është i pari i një ngarkese nafte venezueliane mes sanksioneve të SHBA-së që kanë qenë në fuqi që nga viti 2019.
Është gjithashtu veprimi i parë i njohur i administratës Trump kundër një cisterne të lidhur me Venezuelën që kur ai urdhëroi një grumbullim masiv ushtarak në rajon.
Qeveria e Venezuelës deklaroi se sekuestrimi “përbën një vjedhje të hapur dhe një akt piraterie ndërkombëtare”, citon Guardian.
Ai vazhdoi: “Në këto rrethana, arsyet e vërteta për agresionin e zgjatur kundër Venezuelës më në fund janë zbuluar… Gjithmonë ka pasur të bëjë me burimet tona natyrore, naftën tonë, energjinë tonë, burimet që i përkasin ekskluzivisht popullit venezuelian.”
Më parë, duke folur në një tubim në Karakas, Maduro u bëri thirrje qytetarëve të veprojnë si “luftëtarë” dhe të jenë të gatshëm “t’i thyejnë dhëmbët perandorisë së Amerikës së Veriut nëse është e nevojshme”.
Të martën, dy avionë luftarakë amerikanë fluturuan rreth Gjirit të Venezuelës për rreth 40 minuta. Avioni fluturoi pak në veri të Maracaibos, një nga qytetet më të populluara të Venezuelës.
Venezuela ka rezervat më të mëdha të provuara të naftës në botë dhe, megjithëse vitet e keqmenaxhimit dhe korrupsionit i kanë shkaktuar dëme të rënda industrisë së saj të naftës, eksportet e naftës mbeten burimi kryesor i të ardhurave të Venezuelës. Klienti kryesor është Kina.
