Shtetet e Bashkuara të Amerikës mohojnë se ka pasur koordinim me ta lidhur me shpalljen e “Mbrojtjes Civile” dhe “Brigada e Veriut” si organizata terroriste.
Në një përgjigje për tëvë1, Departamenti Amerikan i Shtetit, potencon se Kosova do duhej të koordinohej me ta për një vendim të tillë.
“Vendimi i Qeverisë së Kosovës për të shpallur këto grupe si organizata terroriste nuk ka qenë i koordinuar me SHBA-në dhe partnerët e tjerë ndërkombëtarë. Ky vendim do të duhej të koordinohej me partnerët më të ngushtë ndërkombëtarë të Kosovës, përfshirë ata të cilët kanë përgjegjësinë primare për të siguruar stabilitetin e Kosovës. Ne sërish i bëjmë thirrje Kosovës që të përmbahet nga hapat e njëanshëm përderisa ne po punojmë me të gjitha palët për të zgjidhur krizën aktuale”, thuhet në përgjigjen e DASh.
Mungesën e koordinimit e theksuan edhe ambasada gjermane dhe britanike.
Si veprim të gabuar moskomunikimin e ekzekutivit kosovar me partnerët ndërkombëtar lidhur me një vendim që prek çështje të sigurisë, e quan analisti, Dritëro Arifi.
Në mbledhjen e Qeverisë së Kosovës, pro vendimit për shpallje të dy organizatave terroriste, votuan pro të gjithë ministrat, me përjashtim të ministrit për Kthim dhe Komunitete, Nenad Rashiq.
