Autore:Jona Kelmendi
Nga e shtuna, qindra biznese në vend që nuk kanë marrëveshje me një furnizues të licencuar rrezikojnë të mbesin pa energji elektrike.
Kjo pasi që vendimi i Zyrës së Rregullatorit për Energji për liberalizimin e tregut të energjisë hyn në fuqi më 16 gusht detyron ndërprerjen e furnizimit për të gjithë ata që nuk kanë marrëveshje me kompanitë e licencuara për rrymë.
“Duke filluar nga nesër, e shtunë, 16 gusht 2025, KEDS-i e ka të ndaluar ligjërisht të lejojë vazhdimin e furnizimit me energji elektrike për ata konsumatorë që nuk kanë arritur marrëveshje me ndonjërin prej Furnizuesve të licencuar.Mbi bazën e këtij njoftimi dhe në respektim të Ligjit për Energjinë Elektrike, si dhe për të ruajtur stabilitetin dhe integritetin e sistemit elektroenergjetik, KEDS-i do të shkyçë nga rrjeti elektrik shpërndarës të gjithë ata konsumatorë që nuk kanë një marrëveshje aktive furnizimi me energji elektrike”, thuhet nga KEDS.
Përfaqësuesit e bizneseve thonë se vendimi do të ketë pasoja të rënda për ekonominë dhe prodhimin në vend.
“Çdo vendim i periudhave të fundit të ZRRE dhe tani edhe nga ana e KESCO dhe KEDS është i dëmshëm dhe i gabueshëm është një qasje jashtëzakonisht shkatërruese për ekonomin e Kosovës sepse vendime të tilla nuk i ndihmojnë zhvillimit dhe as prodhimit të por i ndihmojnë vetëm interesave dhe klanave dhe njerëzve të caktuar por jo të zhvillimit ekonomik dhe mirëqenies së qytetarëve në përgjithësi”, ka thënë Besart Dreshaj.
Gjithashtu edhe nga Oda Ekonomike e Kosovës, ky vendim shihet si një nga më të dëmshmit për bizneset në vitet e fundit.
“Është një ndër vendimet më të këqija të 5 vitëshit të fundit që ka pas biznesi edhe ekonomia e Kosovës është një vendim që nuk ish dashtë me ndodh ish dashtë ndoshta me ndodh e kundërta që ndoshta së bashku me sektorin privat me përcaktu një plan të veprimit nëpërmjet te cilit e kishim caktu edhe kushtet por edhe kohën kur me dal në treg të lirë dhe na mu ndi krenar që po realizojmë një obligim të daljes në treg në mënyrën më të mirë të mundshme por ka ndodh e kundërta”, ka thënë Lulzim Rafuna.
E nga ana ligjore, avokati Ardian Bajraktari thotë se tashmë nuk ka pengesa për daljen e bizneseve në tregun e hapur të energjisë.
“Fillimisht duhet thënë që me rastin e aprovimit të ankesës nga dhoma e shkallës së dytë së gjykates komerciale aprovimi i ankesës së zyrës së rregullatorit të energjisë është heq masa e përkohshme dhe rrjedhimisht për bizneset nuk është aprovu një biznes i tillë tashmë nuk ka pengesa ligjore që të dilet në treg të hapur megjithatë e vlerësoj që është jashtëzakonisht e rendesishime që të ketë një komunikim sa më të mirëfillt mes te komunitetit të bizneseve dhe organeve përkatësisht të zyres se rregullatorit dhe mekanizmave të tjerë”, është shprehur Bajraktari.
Sipas vendimit të ZRRE-së, të gjitha kompanitë që kanë më shumë se 50 punëtorë, ose qarkullim mbi 10 milionë euro në vit, janë detyruar të kalojnë në tregun e hapur të energjisë.
