Nuk ka dhënë fitues derbi dramatik dhe shumë i rëndësishëm në mes të Manchester Cityt dhe Liverpoolit. Ndeshja e luajtur të dielën mbrëma në Etihad përfundoi 2:2.
City ishte dy herë në epërsi, por Liverpooli barazoi dy herë. Që në minutën e pestë Kevin de Bruyne realizoi për 1:0. Goditja e tij u devijua për të përfunduar në portë.
Shifrat në 1:1 u barazuan në minutën e 13-të, kur Diogo Jota realizoi pas asistimit të Trent Alexander-Arnold.
Gabriel Jesus ktheu epërsinë e Cityt. Ai shënoi për 2:1 në minutën e 36-të, me asistim të Joao Cancelo.
Me të nisur pjesa e dytë Sadio Mane shënoi prë 2:2, pas asistimit të Mohamed Salah.
City e dërgoi topin në rrjetë edhe në minutën e 63-të, por goli nuk u pranua pas rishikimit të situatës në VAR.
Raste tjera ka pasur deri në fund në ndeshjen me ritëm të jashtëzakonshëm, por gola nuk u shënuan.
Kështu City e Liverpooli vazhdojnë garën për titull. City udhëheq me 74 pikë nga 31 ndeshje. Liverpooli është i dyti me 73 pikë nga 31 ndeshje.
Ndeshja i takoi xhiros së 32-të. Deri në fund të dy skuadrat i kanë edhe nga shtatë ndeshje.
