Mbledhja e Kuvendit komunal në veri të Mitrovicës më 18 dhjetor, rezultoi me një vendim të kundërligjshëm.
Kjo pasi që kryetari i zgjedhur i komunës së Mitrovicës së veriut, Milan Radojeviq në rend të ditës shtoi edhe votimin për daljen e kësaj komune nga Asociacioni i Komunave të Kosovës.
Me shumicën e votave, përveç atyre shqiptare, ky propozim kaloi pasi që Lista Serbe gëzon shumicën.
Këtë vendim po e sheh të paligjshëm, asamblistja nga radhët e Lëvizjes Vetëvendosje në këtë komunë, Aida Doli.
“Është bërë shkelje e ligjit për vetëqeverisje lokale konkretisht nenit 47 e këtij ligji, për arsyeje se kryetari i Komunës nuk shton pika të rendit të ditës, e bëjnë kuvendarët e Kuvendit. Përpos kësaj, kryetari nuk na ka ofruar ndonjë arsyetim me shkrim për kërkesën e tij, unë konsideroj se është e paligjshme. Unë pres që ky vendim të kthehet mbrapsht nga MAPL-ja dhe të kthehet në pikën zero”, deklaroi Doli.
Për këtë çështje, ministri në detyrë i Administrimit të Pushtetit Lokal, Elbert Krasniqi thotë se Lista Serbe po tenton përçarjen e komuniteteve.
“Përtej aspektit procedural, përmes inicimit të kësaj çështjeje, Lista Serbe po dëshmon edhe një herë hapur se ka për synim nxitjen e ndasive ndërmjet komuniteteve, përçarjen, mosbesimin dhe tensionet, duke treguar mungesë gatishmërie për të bashkëpunuar me komunat e tjera në kuadër të Asociacionit”, tha ai.
Kryetari i Asociacionit të Komunave, Sazan Ibrahimi u shpreh për Tëvë1 se në Kuvendin e ardhshëm të AKK-së, ky vendim nuk do të shqyrtohet pasi që kryetarët e katër komunave veriore kanë dalë vullnetarisht.
“Me vendimin e djeshëm të katër komunave të pjesës veriore të Republikës së Kosovës, ata kanë marrë vendim që të dalin nga Asociacioni të Komunave të Kosovës, MAPL do ta administroj procesin. Por neve si Asociacion në Kuvendin e ardhshëm nuk do të shqyrtohet vendimi i këtyre katër komunave sepse në mënyrë vullnetare kanë marrë vendim të tërhiqet nga AKK-ja”.
Në zgjedhjet lokale të 12 tetorit, Lista Serbe fitoi katër komunat veriore.
