Deputetja e Lëvizjes Vetëvendosje, Arijeta Rexhepi, ka kritikuar aktgjykimin e fundit të Gjykatës Kushtetuese lidhur me konstituimin e Kuvendit.
Ajo tha se kjo Gjykatë ka anashkaluar, madje edhe ka kaluar kompetencat e veta kushtetuese.
Sipas saj, vendimi për ndryshimin e formës së votimit për tri herë radhazi nuk ka mbështetje as në Kushtetutë e as në ndonjë rregullore të Kuvendit.
“Gjykata Kushtetuese ka bërë një tekst, ku duket se ka anashkaluar apo edhe ka kaluar kompetencat e saj. Sepse, ka marrë një vendim, i cili nuk është i bazuar në Gjykatën Kushtetuese. Është një pjesë që nuk është fare në Kushtetutë, e as në ndonjë rregullore të Kuvendit. Këtu shihet se Gjykata Kushtetuese ka bërë një tejkalim të kompetencave të saj. Nga Gjykata Kushtetuese kemi pritur që të jap një sqarim të saktë për të dalë nga situata”, tha ajo në emisionin “Ditari” në Tëvë1.
Ajo theksoi se votimi i fshehtë është formë kushtetuese dhe se procesi i ndjekur deri më tani ka qenë në përputhje me aktgjykimet e mëhershme të Kushtetueses.
“Votimi i fshehtë është formë Kushtetuese. Në bazë të procesit që tash ne kemi vepruar është kushtetuese, sepse jemi bazuar në Kushtetutë si dhe në aktgjykimet e mëhershme. Forma e votimit dhe ndërrim i saj është ekuivalent në të tri format e votimit”, deklaroi ajo.
