Vendet kryesore europiane kanë thënë se e mbështesin planin e vendeve arabe për rindërtimin e Gazës që do kushtonte 53 miliardë dollarë dhe do të shmangte zhvendosjen e palestinezëve nga vendi i tyre.
Plani, i hartuar nga Egjipti dhe i miratuar nga udhëheqësit arabë, është hedhur poshtë nga Izraeli dhe nga presidenti i SHBA-së, Donald Trump , i cili paraqiti vizionin e tij për ta kthyer Rripin e Gazës në një “rivierë të Lindjes së Mesme”.
Të shtunën, ministrat e jashtëm të Francës, Gjermanisë, Italisë dhe Britanisë e përshëndetën planin, i cili kërkon që Gaza të rindërtohet për pesë vjet, si “realist”, raporton BBC.
Në një deklaratë, ata thanë se propozimi premton “përmirësim të shpejtë dhe të qëndrueshëm të kushteve katastrofike të jetesës” për popullin e Gazës.
Plani kërkon që Gaza të qeveriset përkohësisht nga një komitet ekspertësh të pavarur dhe që paqeruajtësit ndërkombëtarë të vendosen në territor.
Komiteti do të jetë përgjegjës për mbikëqyrjen e ndihmës humanitare dhe menaxhimin e përkohshëm të çështjeve të Gazës nën mbikëqyrjen e Autoritetit Palestinez.
Egjipti e paraqiti planin në një samit urgjent të Ligës Arabe të martën dhe ai u mirëprit nga Autoriteti Palestinez dhe Hamasi .
Deklarata e lëshuar nga katër vendet evropiane të shtunën tha se ata ishin “të përkushtuar për të punuar me nismën arabe” dhe ata vlerësuan “sinjalin e rëndësishëm” që shtetet arabe kishin dërguar duke e zhvilluar atë.
