Të mërkurën mbrëma në kryeqytet kanë përfunduar ndeshjet gjysmëfinale të turneut “Final 4” të Ligës Unike për basketbollistë.
Tashmë, janë mësuar edhe skuadrat finaliste, të cilat do të përballen në finalen e madhe për titullin e kampionit.
Në këtë ndeshje finale, që luhet të enjten prej orës 20:00, do të përballen dy skuadrat nga Kosova, Vëllaznimi dhe Sigal Prishtina.
Vëllaznimi i Gjakovës ishte ekipi i parë që siguroi finalen, pasi në gjysmëfinalen e parë mposhti Golden Eagle Yllin me rezultatin e ngushtë 76:75.
Trey Anderson me 23 pikë, Jericole Hellems me 19 pikë dhe Jason Jitoboh me 17 pikë të shënuara ishin më të dalluarit te Vëllaznimi kurse tek Ylli u veçuan Jan Palokaj e Lis Shoshi që realizuan 18 përkatësisht 17 pikë.
Ndërkohë, në gjysmëfinalen e dytë, Sigal Prishtina e mposhti Besëlidhjen e Lezhës me shifrat 81:67.
Më efikasi te Prishtina ishte Jordan Davis me 19 pikë kurse te Besëlidhja u dallua Marcellus Garrick me 24 pikë të realizuara.
Para ndeshjes finale, do të luhet dueli për vendin e tretë, ku do të përballen Golden Eagle Ylli dhe Besëlidhja.
Turneun “Final 4” të Ligës Unike që nisi të mërkurën dhe përfundon të enjten, po e organizon skuadra e Sigal Prishtinës.
