Fadil Fazliu, vëllau i dëshmorëve Bahri e Fahri Fazliu, ka thënë se bastisja në banesën e tyre, është bërë me urdhër të Gjykatës Speciale, por që sipas Fazliut, gjatë bastisjes nuk është gjetur asgjë.
Sipas tij, banesa është bastisur pasi është menduar se do të gjindet diqka, për vet faktin se sipas tij, kjo banesë ka qenë bazë e luftës gjatë viteve 1988-89.
“Kanë kontrollu çdo gjë që iu ka interesu, por nuk kanë marrë asgjë sepse nuk kanë pasë çka marrin . Sigurisht janë të porositur diçka me marrë, për arsye se kjo ka qenë një bazë e luftës e vjetër prej vitit 88-89. Sigurisht edhe ata shokët që sot janë në Hagë dhe ballafaqohen me padrejtësi atje sidomos Sali Mustafa dhe këta të tjerët Thaqi, Kadriu, Rexha, Nesimi e Jakupi, të gjithë kanë qenë në shtëpinë tonë. Sigurisht ata kanë mendu që do të gjejnë diçka por nuk kanë gjetur, ka pasë më shumë libra, dokumente nuk ka pasë. Nuk më kanë marrë në pyetje vetëm kam ndejtë si dëshmitarë në shtëpinë time” ,tha ai.
Teksa theksoi se në banesë është kontrolluar çdo gjë, dhe i është konfiskuar telefoni personal i tij dhe laptopi për të cilin Fadili tha se ishte laptop i punës.
“Thanë kemi urdhër nga Gjykata Speciale për ta kontrolluar banesën tonë, në dokument shkruhej që Gjykata Speciale ka urdhër për ta kontrolluar banesën tonë kurgjo tjetër. Telefoni im është konfiskuar ku kam fotografi familjare, shoqërore, por edhe laptopin e punës e kam që punoj në KEDS. Kjo banesë ka funksionu si bazë e UÇK-së deri u kry lufta dhe sot është banesë e shoqërisë tonë vazhdimisht mblidhemi sidomos gjatë përvjetorit”, shtoi vëllau i dëshmorëve Fazliu.
Ndryshe, Dhomat e Specializuara në Hagë kanë thënë se nuk kanë ndonjë koment në lidhje me bastisjen që ka ndodhur sot në banesën e dëshmorëve, Bahri dhe Fahri Fazliu.
“Ne nuk kemi ndonjë koment”, thuhet në përgjigjen e tyre drejtuar teve1.info.
