Leonard Ademaj, vëllai i të ndjerës, Liridona Ademaj ka thënë se kanë marrë pjesë përmes avokatit të tyre këtë javë në intervistimin e të dyshuarve për vrasjen e motrës së tij.
Ai ka thënë se janë të kënaqur me mënyrën se si prokurorja ka organizuar intervistimin e tyre dhe kanë besim të plotë në të.
Tutje, ai ka thënë se drejtësia duhet të triumfojë për Liridonën dhe të gjitha gratë dhe vajzat e vrara.
“Përshëndetje, këtë javë prokurorja e rastit së bashku me hetuesit kanë intervistuar të dyshuarit për vrasjen e Liridonës tonë. Ashtu siç parashihet me ligj, ne si familje kemi marrë pjesë në intervistim përmes avokatit tonë.
Për të respektuar në plotni sekretin hetimor dhe proceduren penale, ne nuk do të komentojmë përmbajtjen e deklarimeve. Mirëpo, duam ta përmendim që jemi të kënaqur me mënyrën se si prokurorja ka organizuar intervistimin e tyre dhe kemi besim të plotë në të. Drejtësia duhet dhe do të triumfojë, për Liridonën tonë dhe për të gjitha gratë dhe vajzat e vrara”, ka shkruar ai në Facebook.
Ndryshe, sot në media është publikuar deklarata e plotë e dhënë prokurorisë nga bashkëshorti i Liridonës, Naim Murseli.
Naim Murseli, dyshohet se porositi vrasjen e gruas së tij Liridonës, duke i premtuar 30 mijë euro Granit Plavës që ta kryente vrasjen. Ndërsa, i arrestuari tjetër në këtë rast, Kushtrim Kokalla dyshohet për marrëveshje për të kryer veprën penale vrasja e rëndë.
