Shkëlqim Pajazitaj në një lidhje direkte në Tëvë1, ka thënë se sot kanë qenë të njoftuar se do të shfaqen video incizime të ditës kur është vrarë Donjeta dhe për këtë arsye, sipas tij kanë vendosur që të marrin pjesë në seancë.
“Kemi qenë të njoftuar që të shikohen kamerat për këtë arsye kemi vendosur të marrim pjesë dhe përkundër asaj që po kemi përplasje me gjyqtarin, kemi vendosur që të marrim pjesë sepse po na intereson shumë për të ditur se çfarë po bëhet me rastin e Donjetës”, tha ai.
Pajazitaj ka thënë se shpreson se Gjykata Themelore në Ferizaj do të vlerësoj në mënyrë të drejtë rastin e Donjetës.
Ai thotë se kanë fakte rreth ditës së vrasjes së Donjetës.
“Po shpresojmë se kanë me i vlerësuar sa ma mirë dhe sa më drejtë, mbasi dalin edhe në vendin e ngjarjes. Kemi fakte se i akuzuari ka thënë se unë jam shkuar në anën tjetër dhe e ka kamera e shtëpisë së Gëzim Hamdimetaj, ku ai shkon në drejtim të rrugës kryesore ku të shpie Pejë dhe Deçan. Dhe kemi faktin tjetër kur kemi me shkuar në Bjeshkë, prej rrugës kryesore deri në vendin kur është gjetur trupi, diku janë 50 ose më shumë metra në atë kohë nuk ka pasur mundësi as xhipi të hyjë andej. Trupin e saj u deshtë të ngreh zhag. Është një fakt shumë që na bën me dyshu. Nëse nuk është vrarë aty si ka mundur Naseri ta dërgoj Donjetën deri të vendi kur është gjetur gjallë. Ajo kish reaguar ose kish mundur së paku ta shoh dikush se ka qenë mesi i ditës”, tha më tej Shkëlqim Pajazitaj.
Sipas tij, vendimi për të akuzuarin Naser Pajazitaj të jetë vendim sikur i herës së kaluar.
Edhe nëse çështja rikthehet në rigjykim, vëllai i Donjetës thotë se nuk do të ndalen asnjëherë.
“Të jetë vendim sikur herën e kaluar dhe të jetë njëjta bindje si nga gjykata themelore po ashtu edhe supremja. Dëshira është e madhe për të zbuluar arsyen se çfarë ka mundur Naserin të shtyjë ndaj bashkëpunëtorëve të mundshëm se gjithë e dimë gjendjen e tij shëndetësore. Nuk kemi me u ndal, kemi mundësi të vazhdojmë deri në shkallët më të larta, sepse po na intereson me të vërtet pse po “zhagitet” kaq shumë”, ka përfunduar ai.
Gjykata Themelore në Pejë, në mars të vitit 2019 e kishte shpallur fajtor të akuzuarin Naser Pajazitaj dhe e kishte dënuar me burgim të përjetshëm. Dënim ky që ishte vërtetuar edhe nga Gjykata e Apelit në korrik të vitit 2019.
Por, në nëntor të vitit 2019, Gjykata Supreme i kishte prishur të dy aktgjykimet dhe lëndën e kishte kthyer në rigjykim. /teve1.info/
