Kryetari i Bashkisë së Tiranës, Erion Veliaj, më 30 prill ka qëndruar në Prokurorinë e Posaçme kundër Krimit të organizuar dhe Korrupsionit (SPAK) për rreth tetë orë. Ai tha për gazetarët se shkoi në SPAK në cilësinë e bashkëpunëtorit dhe kishte një kohë që kishte kërkuar një takim.
Gjatë qëndrimit në SPAK, Veliaj tha se dha të gjitha sqarimet në lidhje me inceneratorin e Tiranës.
Për këtë çështje, në dhjetor të vitit të kaluar u lëshuan 15 urdhërarrestime, përfshirë edhe ndaj zyrtarëve të bashkisë së Tiranës. Ndërkaq, paraprakisht në gusht të vitit të kaluar ishte sekuestruar kompania që ka fituar tenderin për ndërtimin e inceneratorit të Tiranës, e përfshirë edhe në dy djegësit e tjerë në Fier dhe Elbasan.
“Patëm një ezaurim total të çështjes së inceneratorëve, të gjithë shpjegimet e nevojshme. U thanë dhe disa detaje të tjera. Të dy kolegët hetues më kërkuan që për çështje të hetimit dhe të sekretit hetimor, duke qenë se bashkia ka dërguar dhe disa detaje të tjera, të mos i ndaj me gazetarët disa detaje”, tha Veliaj.
Në deklaratën e shkurtër para mediave, Veliaj vlerësoi punën e SPAK-ut, tha se ndihej mirë, duke folur për forcimin e institucioneve dhe duke kërkuar që të mos “përgojohen” institucionet e drejtësisë.
“Ndihem mirë që sot unë dhe ata që më duan ndihen të lehtësuar. Besoj se armiqtë e mi ndihen më të lehtësuar. Se unë besoj që një njeri duhet vlerësuar dhe nga armiqtë që bën”,tha kryebashkiaku i Tiranës.
Kjo është hera e parë që Veliaj u paraqit në SPAK. Ky institucion po heton për inceneratorin e Tiranës, çështje për të cilën janë arrestuar ish-zyrtarë të bashkisë. Ndërkaq në mars të këtij u arrestuan edhe dy drejtorë të bashkisë së Tiranës nën dyshimet për korrupsion dhe fshehje pasurie. Pesë ish-zyrtarë të kësaj bashkie dyshohet se janë pronarët realë të kompanisë ‘5D’ që sipas hetimeve paraprake kanë përfituar tenderë nga institucioni ku ata punonin.
Për të dyja këto çështje, Erion Veliaj është akuzuar nga opozita se është i përfshirë. Në reagimet tij, Veliaj është distancuar nga ish-zyrtarët nën hetim dhe ka deklaruar se kushdo që është përfshirë në veprimtari të paligjshme duhet të përballet me drejtësinë./rel
