Një punëtor ka humbur jetën si pasojë e lëndimeve trupore, pasi ra nga skeletet e një ndërtese në ndërtim në lagjen “Bajram Curri” në Prizren.
Lajmin për tëvë1.info e ka konfirmuar zëdhënësi i Policisë për rajonin e Prizrenit, Shaqir Bytyqi.
Sipas Bytyqit, viktima fillimisht u dërgua në Emergjencën e Spitalit Rajonal të Prizrenit në gjendje të rëndë, por më vonë, rreth orës 16:30, u konfirmua se kishte vdekur në Qendrën Klinike Universitare të Kosovës (QKUK) në Prishtinë.
Në lidhje me rastin, i dyshuari N.B., pronari i kompanisë ndërtimore, pas intervistimit nga Prokurori i Shtetit, është ndaluar për 48 orë si i dyshuar për veprën penale “Asgjësimi, dëmtimi apo heqja e pajisjeve dhe rrezikimi në vendin e punës”.
Ndërkaq, Policia, në bashkëpunim me Prokurorinë, Inspektoratin e Punës dhe njësitë kompetente hetimore, po ndërmerr të gjitha veprimet për sqarimin e plotë të rrethanave të aksidentit.
“Më datë 29.10.2025, rreth orës 13:30, është raportuar se një person ka pësuar lëndime trupore pasi ka rënë nga skeletet e një ndërtese në ndërtim në lagjen “Bajram Curri” në Prizren. Viktima, F.A., mashkull 34-vjeçar nga fshati Caravik i Malishevës, fillimisht është dërguar në Emergjencën e Spitalit Rajonal të Prizrenit në gjendje të rëndë, por më vonë, rreth orës 16:30, është njoftuar se ai ka vdekur në QKUK – Prishtinë. Në lidhje me rastin, i dyshuari N.B., pronar i kompanisë ndërtimore, pas intervistimit me vendim të Prokurorit të Shtetit është ndaluar për 48 orë, si i dyshuar për veprën penale “Asgjësimi, dëmtimi apo heqja e pajisjeve dhe rrezikimi në vendin e punës. Policia, në bashkëpunim të ngushtë me Prokurorin e Shtetit, Inspektoratin e Punës dhe njësitë kompetente hetimore, po ndërmerr të gjitha veprimet e nevojshme për sqarimin e plotë të rrethanave të rastit”, ka njoftuar Bytyqi./teve1.info/
