Ka vdekur të hënën Izet Gjinovci, sekretari i përgjithshëm i Federatës së Hendbollit të Kosovës.
Gjinovci vdiq në moshën 63-vjeçare, ndërsa konsiderohet prej figurave më të rëndësishme në histori të këtij sporti në Kosovë.
Postin e sekretarit, Gjinovci e ka kryer prej vitit 2022, ndërsa ka udhëhequr proceset më të rëndësishme të pranimit ndërkombëtar të FHK-së.
Gjinovci ishte ish-lojtar i Prishtinës dhe më pas drejtues shumëvjeçar i këtij klubi për të cilin ka sakrifikuar shumë sikurse për hendbollin kosovar në përgjithësi.
“I ndjeri Gjinovci ia ka kushtuar gjithë jetën sportit të hendbollit. Detyrat e tij si sekretar i përgjithshëm i ka kryer me përkushtim e pasion shembullor deri në frymën e fundit. Kontributi i tij për zhvillimin e hendbollit kosovar është kolosal. Pas karrierës së suksesshme si hendbollist i Prishtinës, i ndjeri Gjinovci mori drejtimin e klubit prishtinas. Ka sakrifikuar shumë për ta udhëhequr klubin me sukses, ndërsa në një periudhë e kishte shkrirë gjithë pasurinë për mbarëvajtjen e klubit. Ka kontribuuar në pavarësimin e sportit kosovar, ndërsa në vitet nëntëdhjeta, kur sporti kishte misionin e kundërvënies ndaj pushtuesit, është shquar me angazhimin e pandalshëm. Ishte pjesë e organizimeve të rëndësishme të hendbollit dhe pjesë e pandashme e tij”, ka shkruar FHK-ja ndër të tjera.
Falë kontributit të madh të Gjinovcit, FHK-ja që në vitin 2004 u bë anëtare e përkohshme e Federatës Evropiane të Hendbollit dhe klubet kosovare e fituan të drejtën e paraqitjes në gara ndërkombëtare. Edhe me të drejta të plota FHK-ja u pranua e para prej federatave të sporteve ekipore dhe edhe ky proces njeh kontributin e madh të Gjinovcit.
“Edhe me të drejta të plota FHK-ja u pranua e para prej federatave të sporteve ekipore dhe edhe ky proces njeh kontributin e madh të Gjinovcit”, shkruan FHK-ja, duke bërë me dije se prej prillit të vitit 2021, ai ishte pjesë e Gjykatës së Apelit të EHF-së.
Me ndarjen nga jeta të Gjinovcit, hendbolli kosovar dhe FHK-ja kanë mbetur pa një shtyllë shumë të rëndësishme.
