Një 61-vjeçar ka humbur jetën pasi vetura e tij, e parkuar, ka lëvizur prapa dhe e ka rrëzuar nga një mur mbi gjashtë metra i lartë, mbrëmjen e sotme në fshatin Mushnikovë të Prizrenit.
Zëdhënësi i Policisë Rajonale të Prizrenit, Shaqir Bytyqi, për teve1.info ka bërë të ditur se viktima po vendoste një gur për siguri prapa automjetit, pak para se ai ta godiste.
Ai shtoi se fillimisht është konstatuar se personi kishte ende shenja jete, por ka ndërruar jetë gjatë transportit për në Ambulancën e Reçanit.
Në vendngjarje kanë dalë njësitë policore dhe është njoftuar Prokurori i Shtetit, i cili ka urdhëruar nisjen e rastit si “Hetim i Vdekjes”.
Policia thotë se hetimet janë duke vazhduar.
“Rreth orës 12:17 në fshatin Mushnikovë të Prizrenit është raportuar për një person të gjetur pa shenja jete. Sipas informacioneve fillestare, viktima R.S., mashkull 61 vjeçar, pasi kishte parkuar veturën dhe po vendoste një gur për siguri, është goditur nga lëvizja prapa e automjetit dhe është rrëzuar nga një mur mbi 6 metra i lartë. Fillimisht është konstatuar se kishte shenja jete, por gjatë transportit drejt Ambulancës së Reçanit ka ndërruar jetë. Në vendngjarje kanë dalë njësitë policore relevante, gjithashtu është informuar Prokurori i Shtetit, i cili ka urdhëruar fillimin e rastit “Hetim i Vdekjes”. Rasti është në hetim”, tha ai.
