Një 24-vjeçar ka humbur jetën dhe një tjetër ka mbetur i lënduar, si pasojë e një aksidenti që ka ndodhur sot në fshatin Terstenik të Drenasit.
Sipas informacioneve të para, në këtë aksident janë përfshirë një veturë dhe një motoçikletë.
Vdekja e viktimës është konstatuar nga ekipet mjekësore në QKMF-në e Drenasit.
“Sot rreth orës 15:00 kemi pranuar informatën se në fshatin Terstenik të Drenasit, ka ndodhur një aksident trafiku me pasoja fatale. Në këtë aksident, kanë qenë të përfshira, një motoçikletë dhe një automjet. Si pasojë e aksidentit, lëndime trupore kanë pësuar dy personat që ishin në motoçikletë, njëri prej të cilëve nuk ka arritë të përballojë plagët dhe i njëjti ka ndërruar jetë“, thuhet në konfirmim e Policisë së Kosovës.
Ndërkohë, është bërë e ditur se Policia ka nisur hetimet për zbardhjen e rrethanave që kanë çuar deri te ky aksident trafiku, ndërkohë që ngasësi i automjetit është dërguar në mbajtje.
