Një fëmijë një vjet e gjysmë ka ndërruar jetë të enjten në Spitalin Rajonal të Pejës, ndërsa Policia e Kosovës ka nisur hetimet për rastin, i cili po hetohet me dyshimin për “trajtim të pandërgjegjshëm mjekësor”.
Sipas raportit 24-orësh të Policisë, babai i fëmijës ka deklaruar se të miturin e kishte dërguar në spital për trajtim edhe një ditë më parë, të mërkurën, për shkak të problemeve shëndetësore. Pas trajtimit, fëmija ishte liruar në shtëpi.
“Ankuesi mashkull kosovar ka njoftuar se fëmija i tij, rreth një vjet e gjysmë, pasi e kishte dërguar në Spitalin Rajonal në Pejë për shkak të gjendjes së rëndë shëndetësore, ka ndërruar jetë. Sipas ankuesit, ai edhe me datën 05.11.2025 fëmijën e kishte dërguar për trajtim në spitalin e njëjtë dhe pas tretmanit ishte liruar në shtëpi,” – thuhet në raportin policor.
Të enjten, pas përkeqësimit të gjendjes së fëmijës, prindi e kishte dërguar sërish në spital, ku mjekët kanë konstatuar vdekjen e tij.
Njësitë relevante të Policisë së Kosovës kanë dalë në vendin e ngjarjes dhe, në koordinim me Prokurorin e Shtetit, kanë nisur hetimet për të sqaruar rrethanat e rastit.
“Me urdhër të prokurorit, trupi i pajetë është dërguar në Institutin e Mjekësisë Ligjore (IML) për obduksion,” – konfirmon raporti i policisë.
Hetimet po vazhdojnë për të përcaktuar nëse ka pasur neglizhencë mjekësore gjatë trajtimit të fëmijës në Spitalin e Pejës.
