Mëngjesin e së shtunës u raportua për vdekjen e një foshnje në Qendrën Klinike Universitare të Kosovës.
Kjo pasi nëna e foshnjes e abortoi atë dhe u largua nga spitali.
Këtë rast e ka konfirmuar për Tëvë1 drejtori i Klinikës së Gjinekologjisë, Zef Ndrejaj.
“Faktisht është abort në javën e 20 dhe e ka braktisur nëna e vet, edhe nuk ka lindë e vdekur, por mbas një kohe, fëmija 20 javësh normalisht që nuk mundet të mbijetojë. Ajo e ka braktisë dhe Policia po merret me rastin. Ne e kemi lajmëruar në Polici, ata janë duke shqyrtuar rastin, kush është ajo, dhe si ka ikur nga klinika. Me siguri ka stimuluar lindjen jashtë, ka marrë ndonjë tabletë, ka ardhur këtu. Me urdhër të Prokurorit të Shtetit, trupi i pajetë i foshnjat është dërguar në Institutin e Mjekësisë Ligjore”
Rasti në fjalë është konfirmuar edhe nga Policia e Kosovës, teksa kanë hapur hetimet mbi shkaqet e vdekjes.
“Viktima foshnje e cila ishte duke u trajtuar në QKUK, në rrethana ende të panjohura ka ndërruar jetë. Me vendim të prokurorit, trupi i pajetë është dërguar në IML”.
Sipas sociologes, Dhurata Prokshi ky rast flet edhe një herë për gjendjen shoqërore dhe për mungesën e vetëdijes që jeta e njeriut ne çdo etapë duhet të mbrohet.
Ajo tregon se cilat mund të jenë arsyet që gratë të marrin këto vendime.
Televizioni ka tentuar të marrë një përgjigje edhe nga Prokuroria, por të njëjtit ende nuk kanë dhënë detaje të tjera në lidhje me rastin.
Kronikë nga gazetarja: Rinesa Osmanaj
