Ka ndërruar jetë ish-zëvendëskomandanti i batalionit të Brigadës 164 të Ushtrisë Çlirimtare të Kosovës, Menduh Brava.
Lajmin e bëri të ditur kryetari i Aleancës për Ardhmërinë e Kosovës, Ramush Haradinaj, i cili ka ngushëlluar familjen Brava dhe miqtë për humbjen e të ndjerit.
Haradinaj përkujtoi kontributin e Bravës gjatë luftës për liri, duke theksuar përkushtimin e tij të palëkundur ndaj atdheut. Pas luftës, Menduh Brava ka shërbyer si kryetar i OVL-UÇK-së në Han të Elezit dhe kishte kandiduar në zgjedhjet lokale të fundit për asamble nga radhët e AAK-së.
“Me dhimbje mora lajmin për ndarjen nga jeta të Menduh Bravës. I ndjeri, gjatë luftës për liri, i shërbeu me nder atdheut si zëvendëskomandant i batalionit në Brigadën 164 të UÇK-së, ndërsa pas luftës ishte kryetar i OVL-UÇK-së në Han të Elezit. Kisha nderin të rrugëtojmë bashkë edhe politikisht, në zgjedhjet e fundit lokale ishte kandidat për asamble nga Aleanca për Ardhmërinë e Kosovës. Ngushëllimet më të sinqerta familjes Brava, miqve dhe gjithë aktivistëve tanë në Han të Elezit. U prehsh në paqe, Menduh!”, ka shkruar ai. /teve1.info/
