Në vitit 1988, u zgjodh kryetare e Komitetit Krahinor të Lidhjes së Komunistëve të Kosovës.
Kështu, Kaqusha Jashari, u bë kryetarja e vetme femër e një partie në vendet e ish-Jugosllavisë.
Vetëm një vit më vonë, nën masa të dhunshme, regjimi i Slobodan Millosheviqit, i suprimoi antoniminë Kosovës.
Kështu edhe gjuha e Millosheviqit, u ashpërsua.
Kësaj retorike të Millosheviqit, jo të gjithë patën guximin t’i dalin kundër.
Por, këtë e bëri Kaqusha Jashari, madje në Beograd.
“Kjo mbledhje është mbajtur në komitetin atëhershëm qendror të ish-lidhjes komuniste të Jugosllavisë, Kaqusha ka qenë përfaqësuese nga ish-krahina autonome socialiste e Kosovës…2:17 aty ka pasur një polemikë dhe debat të ashpër për qasjen e Kosovës. Millosheviqi si një diktator i vrazhdë, e ka ngritur në mënyrën më poshtëruese çështjen e Kosovës dhe Kaqusha jo vetëm se ka reaguar, por ma ka treguar rastin edhe vet Kaqusha, që ia ka ngrit gishtin të sytë dhe i ka thënë që nuk mundësh me veprua kështu në Kosovë”, thotë Gjergj Dedaj – ish – themelues i partisë Liberale të Kosovës.
Vepra e aktivistes për të drejtat e njeriut, u kujtua edhe një herë të martën.
Kjo meqë familjarët njoftuan se ish-deputetja e Kuvendit të Kosovës, Kaqusha Jashari, ka ndërruar jetë në moshën 79 vjeçare.
Ata që e njohën nga afër, thonë se Kaqusha Jashari ishte ikonë e politikës kosovare.
“Të jesh grua, shqiptare dhe të jesh në Beograd e të punosh për çështjen e Kosovës, ka qenë diçka ekstrem e vështirë. Mirëpo një profil i një zonje si Kaqusha Jashari, zonjë e hekurt, e ka përfaqësuar denjësisht Kosovës”, thotë Dedaj.
Për vdekjen e ish-themelueses së Partisë Socialdemokrate të Kosovës, ka shkruar edhe presidentja e Kosovës, Vjosa Osmani dhe krerë të partive politike në vend.
“Jeta dhe vepra e znj. Jashari përfaqësojnë përkushtimin ndaj vendit, si zë i fuqishëm në kohë të vështira politike, si themeluese dhe udhëheqëse e një partie politike, si deputete e zgjedhur nga populli, por edhe si krijuese në sferën e artit. Ju shpreh ngushëllime të sinqerta familjes, miqve, bashkëpunëtorëve dhe Partisë Socialdemokrate të Kosovës, thuhet nga Osmani.
Kaqusha Jashari u varros mesditën e së martës në Prishtinë.
