Frank Caprio, gjyqtari i cili u bë i njohur në mbarë botën për dhembshurinë dhe humanizmin e tij në sallën e gjyqit ka vdekur.
Ai ndërroi jetë në moshën 88-vjeçare, pas një beteje të gjatë dhe të guximshme me kancerin pankreatik.
Lajmi u bë i ditur përmes një postimi në rrjetet e tij sociale të mërkurën, më 20 gusht.
“Gjyqtari Frank Caprio u nda nga jeta në mënyrë të qetë, duke lënë pas një trashëgimi të pasur me dashuri, mirësi dhe respekt për çdo njeri,” thuhej në deklaratë, raporton “New York Post”.
Ai do të mbahet mend jo vetëm si një gjyqtar i respektuar, por edhe si bashkëshort i përkushtuar, baba, gjysh, stërgjysh dhe mik i dashur.
“Ngrohtësia, humori dhe mirësia e tij lanë gjurmë të pashlyeshme në jetët e atyre që e njohën. Ai frymëzoi miliona njerëz me dhembshurinë dhe përulësinë e tij, duke besuar gjithmonë në mirësinë e njerëzve,” vijon njoftimi.
“Në nder të tij, le të përpiqemi të sjellim më shumë dhembshuri në botë — ashtu siç bënte ai çdo ditë.”
Postimi u shoqërua me një foto të tij me rrobën e gjyqtarit, si dhe disa imazhe të tjera nga jeta e tij, përfshirë momente me familjen.
Më pak se 24 orë para ndarjes nga jeta, gjyqtari iu drejtua ndjekësve të tij përmes një videoje emocionale nga shtrati i spitalit, ku falënderoi të gjithë për dashurinë dhe mbështetjen.
