Ka ndërruar jetë të shtunën gazetari, redaktori e korrespodenti, Sylejman Shaqiri.
Lajmi është bërë i ditur nga familja e tij nëpërmjet një postimi në Facebook.
“Me dhimbje të thellë ju njoftojmë se më i dashuri ynë – Sylejman Shaqiri u nda nga jeta sot, duke lënë pas një boshllëk të pazëvendësueshëm në zemrat tona. Lamtumira jonë është e rëndë, por mirënjohja për jetën që ndamë me të është e pafund. Rreth ceremonisë së varrimit do të ju njoftojmë së shpejti. Të gjithë ata që duan të nderojnë kujtimin e tij janë të mirëseardhur. Pusho në paqe, Babi. Do të të duam përjetësisht”, thuhet në njoftim.
Sylejman Shaqiri karrierën e nisi në fillim të viteve ’80, në Radio Ferizaj, ku shërbeu si kryeredaktor dhe drejtor, për të vazhduar më pas në Radio Televizionin e Prishtinës si gazetar dhe redaktor përgjegjës.
Pas mbylljes së dhunshme të RTP-së, kontributi i tij vazhdoi në Radio Kroacia dhe Radio Tirana.
Pas luftës mbajti pozitat më të larta, duke përfshirë atë të drejtorit të përgjithshëm të Radio Televizionit të Kosovës (RTK), ku ishte edhe redaktor lajmesh e udhëheqës i disa emisioneve.
