Ka ndërruar jetë edhe pasagjerja e dytë në aksidentin e sotëm në Ranillug.
Në vendngjarje ishte konstatuar vdekja e shoferes, e më vonë në spital ka vdekur edhe njëra pasagjere.
Lajmin për tëvë1.info e konfirmoi zëdhënësi i policisë për rajonin e Gjilanit, Ismet Hashani i cili tha se pasagjerja e tretë që ishte në veturë, u dërgua në QKUK.
“Në emergjencën edhe përkundër ndihmës së ofruar nga ana e personelit mjekësor po ashtu ka ndërruar jetë edhe njëra nga pasagjeret, vdekjen e së cilës e ka konstatuar mjeku kujdestar gjersa pasagjerja e tretë është dërguar në Qendrën Klinike Universitare në Prishtinë për tretman të mëtejmë”, deklaroi ai.
Fillimisht, policia njoftoi për vetaksident, por pas këqyrjes së kamerave dhe mbledhjes së provave të tjera, policia tha se kishte qenë një aksident mes veturës dhe një kamioni.
“Si rezultat i veprimeve hetimore nga Njësiti Rajonal i Komunikacionit Rrugor, shikimit të vendit të ngjarjes, këqyrjes së kamerave dhe mbledhjes së provave të tjera, me vendim të Prokurorit të Shtetit është ngritur dyshimi se nuk kemi të bëjmë me vet aksident por me aksident trafiku ku dyshohet se drejtuesi i kamionit me targa vendore mashkull Kosovar i vitit të lindjes 1970 si pasojë e kthimit të pasigurt ka penguar lëvizjen e automjetit i cili ishte në tejkalim, ku drejtuesja e automjetit nga mos përshtatja e shpejtësisë me kushtet e rrugës humbë kontrollin mbi mjet në tentativë për shmangie të goditjes së kamionit dhe përfundon e rrokullisur jashtë rrugës”, ka thënë ndër të tjera ai.
Tutje, policia ka bërë të ditur se i dyshuari me vendim të Prokurorit të Shtetit është ndalur për 48 orë./teve1.info/
